11. September

Unbewusst das grad 11. September gsi isch (für die wos nüm wüssed: das isch dä Tag wo sWorld Trade Center vo dä Taliban agriffe worde isch und somit au verantwortlich für di amerikanisch Invasion), simmer am obig no än Film am luege gsi. Irgend so än Chriegsfilm.

Strub würds denn usse am Huus me gschosse wird wie im Film. Ich erlebs jo würkli nid viel das gschosse wird, seinzige mol wos intensiv gsi isch isch das gsi: Aschlag ufs Verteidigungsministerium. Und jetzt plötzlich so richtig wüescht alles am schüsse!

Naja isch scho chli ä komischs Gfühl, wilmer halt überhaupt nid iiordne cha was passiert... Und ich wette au ä paar Täg spöter weiss niemer vo eu was passiert isch. Sus chömed das jo amigs ä paar Lüt i dä Media mit über.

Äs paar Täg zrugg: Di afghanisch Fuessballmanschaft spielt gägd Maledive, Pakistan und paar anderi um dä SAFF Cup (South Asian Football Federation). Afghanistan gwünnt alles und im Final gäg Indie. Am 11. September. Das hämmir zwor no so halbe mitbecho, aber denn fangts gäg Obig plötzlich übelst a Bolle. Wieso?

Naja mä mue jo irgendwie fiire - und wemer kei Füürwerk hed tuets ä so ä gueti alti AK halt au. Do isch würkli alles id Luft gjagt worde wo dAfghane so i dä Händ ghalte händ. Irgendwelchi Lüchtrakete sind ufe, aber au di schwere MGs wos ufd Polizei Trucks gschweisst händ :-) Irgendwie amüsant, aber teilwis au nid ungföhrlich. Än Kolleg vo mir hed beobachtet wie dPolizei während äm fahre in Himmel gschosse hed und bim über ä Strosseschwelle fahre (gits halt viel do) ischem sMG abägrutscht :-) Än andere hed no gmeint ka, das sig scho guet, so lerned mol alli Usländer di verschiedne Schüss zunterscheide! :-)

Git au Pressebricht drüber (Englisch).

Leider hani keis Video chönne mache, ha dKamera nid däbi ka. Ha einiges neus über Waffe glernt däbi, sowie zum Bispiel das Gwehr i dä Regel "Tracers" drinne händ all paar Schüss, damit mer gseht wod Schüss durä gönd. Die Spure gseht mer denn schön am Himmel! sGeschüsse isch öppe 2h gange.

Trotzdem do händer mol ä chlises Video wies uf dä Strosse usgseh hed (mir händ vo dä Organisation Usgangsverbot ka - zu gföhrlich). Allerdings ghört/gseht mer do fasch kei Schüss - aber mir wohned au imnä Quartier wos viel Polizei/Guards hed, und wemer denn usnahmswis mol dörf schüsse, denn macht mer das au :-) (Ä paar wenig Schüss ghöred ihr bi öppe 1:40):

Jedefalls ischs extrem schön gsi, dAfghane mol so glücklich gseh. Das isch di erscht Fiir sit langem (30 Johr) so als Land. Fasch allne andere "Festlichkeite" hafted entweder religiöse Fundamentalismus oder sustigi Diskriminierigs Problem a. Grad paar Täg vorher händs dä "Massoud" gfiired, än umstrittne Ma. Das freut ä paar, aber isch halt keis Volksfescht. Isch scho speziell, wie äs paar Fuessballspiel di ganz Nation präge cha - und zumnä gwüsse Mass au eine cha.

blog comments powered by Disqus