leben.jedidjah

"Sie warted jetzt no bis är sich id Luft jagt"

geschrieben am Tuesday, May 28, 2013

Aschläg sind jo do in Kabul nix neus. Git ab und zue mol Suizidbomber wo sich id Luft jagt. sZiel isch eigentlich immer eis: Zivili Opfer tüfhalte und Armee/Regierig/ISAF (Amis) schade (töte). Das mit dä zivile Opfer kriegets aber nid ganz so hi, wil vor allem di amerikanische Soldate i ihrne panzerete Wäge so guet gschützt sind, dass unglaublich viel Sprengstoff ufs mol brucht wird, was notürlich wiederum zivili Opfer förderet. Passiert isch das z.B. grad mol wieder vor zwei Wuche . Die Attacke isch übrigens nid vo dä Taliban sondern vo andere Psychopathe usgüebt worde. Do Kabul aber ä 5 Millionestadt isch, chunnt mer meistens vo dem nid mol was mit über. Die Attacke isch i dä Richtig vom Amerikanische Militärflughafe usgüebt worde, wo vor einem Monet das passiert isch:

Ganz viel Action, aber wie gseit, mä chunnt nix dävo mit über.

Und wemer doch was mitbechunnt

Aschlag ufs Verteidiungsministerium isch so öppis vom erste gsi woni mitbecho ha. Zwor nid aktiv, aber bi 2h vorher verbi gfahre. Dörfsch eifach nid zur falsche Ziit am falsche Ort si. Das isch aber für üsi ganz Organisation no nie äs Problem gsi...

Mä chunnt würkli selte was mit über und wil ich michs nid gwohnt bi, merkis meistens ersch viel spöter. Die wenige mol wo gschosse worde isch hani zersch immer gmeint äs sigi Fürwerk. Eimol zum Bispiel hed ä Familie imnä Auto dä Awisige vo dä Polizei nid gfolged und denn isch uf si gschosse worde. Das isch relativ nöch gsi und seinzige mol wo i üsem Quartier was passiert isch bis jetzt. Usserdem hani no paar mol Schüss us dä ferni ghört.

Äs gmüetlichs Wuchenend im 4* Hotel

Bis letzt Wuchenend. Denn ischs plötzlich abgange. Do gohsch mit dä ganze Organisation gmüetlich dä alljöhrlichi "Retreat" is beste Hotel in ganz Afghanistan go mache. Chasch zersch mol sit langem amnä Pool hocke und "nackt" si (heisst Badhose). Frissisch der dä Ranze volle mit Esse usem Weste und gnüssisch dini Ziit weg vo dä Afghane wod gern hesch, aber glichziitig au sehr müehsam und andersch chönd si, teilwis.

Denn fangts a. Sünnelend lisch ufem Ligestuehl und plötzlich explodiert öppis ziemli luut. Denn würd gschosse, witerhin mehreri Explosione, etc. Das hätt mi wohrschinli alles recht verwirrt, aber näb mir im Liegestuehl isch grad eine ghocket wo scho während dä Taliban im Land gsi isch und au sus dSicherheit vom Land sehr guet kennt. Är hed denn mol chli umä telefoniert und nogfröget wie wiit wäg dases isch. 2 Kilometer. Woner die Information gha hed ischer gmüetlich zrugg in Liegestuehl glägä: "Weisch dRPG lösed noch 900m us. Die händ än Selbstuslöser. Wend also wiiter wäg bisch cha der nüt passiere." Guet für mich. Wiiterhin sHotel gnüsse. "Di einzig Gfohr isch jetzt dasäs ä komplexi Attacke isch, wo a mehrere Orte Aschläg erfolget. Drum fahrt jetzt vor üsem Hotel dArmee uf." hed är denn no agfüet.

"Bisch denn nid chli agspannt wenn so was passiert?" - "Nei, weisch sit äm Aschlag ufs Parlament wos über 10h permanent gschosse händ, isch das chline Geballer nüme so bedütend." Ghört hämmer das denn no über di nöchste 5h ab und zue mol. Dä Kolleg vo obe hed denn üserer ganze Organisation mol no äs Update gäh: "Also äs sind jetzt alli tötet worde usser einem. Sie warted jetzt no bis är sich id Luft jagt." Mir händ notürli alli glachet. Aber shed würkli was wahrs. Wenn eine mit viel Sprengstoff und AKs imnä Huus hockt und sich verbarikadiert, was wetsch mache? Drum wird eifach mol wie wild gschosse.

Medie

Wenner das nochli gnauer wend läsä chönder das uf dä NY Times oder im Tagi mache (NY Times isch wesentlich gnauer und hed kei Fähler). Interessant sind dDarstellige vo dä Medie. Kabul selber isch äbä eigentlich gar nid so schlimm dra. Au das Johr hed eigentlich sehr mild agfange in Kabul. Äs isch ä Früehligsoffensive akündt worde, aber die isch wie im Tagi akündt nid 1 Monet sondern zwei Mönet her. dTaliban händ also zwei Mönet brucht bis sie än "grössere" Aschlag händ chönne mache und sind recht kläglich gscheiteret, was recht für di lokal Polizei spricht. Mä vermuetet au das dTaliban sich im Gebäude verwechslet händ. Mir händ meistens di bessere Informatione fürd Medie, wil ä Organisation wo nur für NGO schafft üs die Infos git.

Interessant sind z.B. au dBilder vo dä NY Times, das sind zwor Actionbilder, aber sus isch das eigentlich nid so gwöhnlich. Äs gseht jo scho komisch us wenn normali Polizei mit AKs umälauft... Aber das isch do Realität. Do hed sogar dä Verchehrspolizischt wo i dä Mitti vom Chreisel stoht äs Maschinegwehr. Än Polizist in Afghanistan ohni AK-47 isch wie dä Aargau ohni Autobahne... Irgendwie unbruchbar :-)

Dieser Eintrag wurde mit den Tags Anschlag und Kabul

blog comments powered by Disqus